先講結論，除左結構上我覺得唔夠完滿外，部戲絕對值得一睇。無論構圖、運鏡或人物塑造，幻愛都做得好好。一部兩小時既港產片，有如此製作質素算係咁。
必須承認，我入場既時候係抱著一個「估劇情」既心態，一黎睇之前見到有朋友話要留意細節，二黎因為此戲有著幻覺 \ 精神病既背景，所以不斷提醒自己唔好信劇情，期待一個「so it’s all an illusion」既反轉。冇錯，部戲係有運用此類元素，借一個作為unreliable narrator既精神病人阿樂敘事，令觀眾懷疑有幾多情節係可信的（例如有冇戴手繩、個counselling session係咪發夢等等）。但無可否認，呢啲都唔係此戲既重點，用我呢種心態睇到最尾唔會真正享受到個故事。
幻愛既鏡頭拍得好靚，好多影評已經寫過幻愛鏡頭下既屯門輕鐵有幾日系。尤其係燈光色調好溫暖朦朧，令場景如幻似夢。（啲counselling session我覺得有少少致敬無間道中梁朝偉同陳慧琳既心理輔導lol）至於結局嗰場戲，將屬於純愛幻想既欣欣同代表殘酷現實既葉嵐合二為一，令阿樂無需係虛幻既美好同殘酷既情愛中做出選擇，而模糊既燈光使我相信個結局純屬幻夢，係假的。
當然你的詮釋視乎你的信仰，可能我個人太cynical，我覺得部戲係講緊現代人既孤獨和寂寞，係理性既都市裡超脫不得。所以我會話阿樂同葉嵐在隧道中甜蜜擁抱既結局，都只是一場對於現代人戀愛的浪漫願景，大概也只是幻愛一場。
作者：mklee