我最愛的My Little Airport
唔，最近想寫野，但又唔知寫乜好，就諗左呢個topic：
係playlist入面MLA既歌，每一首抽一句最有感覺既詞，然後係咁以寫幾句野，以下排名不分先後（甘啱15首）
- 悲傷的採購
「為何人大了就要成為工作的奴隸 最愛作的不可發揮 我的感覺逐漸流逝
從前曾話過要如何欣賞世界的美麗 現在只懂得放假去消費」
「如果繼續這樣 我還是我嗎 我還喜歡我嗎 或者我應該死去吧 總好過變得更差」
首歌係關於資本主義對人本質上既異化，無論我地幾悲傷，生活幾苦悶，都要繼續採購，繼續成為工作的奴隸 。面對著現代性的虛無，也許唯一既出路就係自殺。
- 土瓜灣情歌
「收音機說北韓已射出導彈 地球另一邊被炸爛
所有的事都不夠虛幻 因現實未到最爛 要到絕望才望見希望在人間
所有的事都不夠虛幻 因現實未到最爛 要到絕望才望見希望在人間
到了某天你我不再浪漫 有不喜歡的工要返
你會否便記起曾笑得這麼燦爛」
你會否便記起曾笑得這麼燦爛」
我最愛既係歌入面既末日感，我幻想到既情景係，有數百隻核彈射向天際，然後你同愛人/知己係露台點一支煙，談談往事，在燦爛的火光中坦然面對死亡。土瓜灣情歌講既係一種coming of age，正如有一天你我不再浪漫，再睇翻呢段文字，我們還會否記起曾笑得這麼燦爛？
- 廣州足浴一夜
「努力又是什麼？ 如果目標已經出錯
這裡有沒有人清楚 越努力越錯得多
本身唔係特別喜愛這首歌，但係聽到上面尼一句，就諗起自己既眾多朋友同學，努力掘尖個頭，形塑自己，想要挑戰成人世界。但廣州足浴一夜正正點出問題，如果本身目標已經出錯，或你根本不知道自己在追尋什麼，走著歪路，越努力只會越錯得多。
- 驗孕的下晝
「世界要你努力去考取功名
但是真誠才是最大本領」
延續上面既懷想，我們自幼既“training”是要我們成為over-achiever，不斷去考取功名，人生就如同一張to-do-list，不斷刪除清單上的目標。可有幾多人明白真誠才是最大本領，如果你三十歲後仍舊能對不公義憤怒，會被生活中既細節感動，也許你才真正過著authentic 的人生。
- 你說之後會找我
「一生人很短／但終點很遠／
任年月讓我再大多幾歲／任年月伴我繼續老去」
首歌好短，同人生一樣。上面一句令我諗起電影擺渡人既台詞：「十年太長，說一輩子又太短」。我地以為一生人有好多時間，其實又唔多，但要我幻想十年後自己係邊（i.e. Where do you see yourself in 5 years?)，我又諗唔到。首歌令我諗起王菲既如風，呼呼呼呼，人生吹下吹下就唔撚見左。
- 你是浪子，別泊岸
「你是浪子別泊岸 就算她笑得多好看
間中回味是最適當 泊岸以後誰想再看」
簡單d講，間中回味是最適當。
- 今晚講嘢夜唔夜
「若你問我什麼先叫做緣份
我會說緣份只留給夠進取的人」
簡單d講，緣份只留給夠進取的人。
- 美麗新香港
「這世界只有一種鄉愁 是你不在身邊的時候
這香港已不是我的地頭 就當我在外地飄流」
鄉愁呢個topic，之前有個post已經講過，依家每次翻香港，都會當自己係異地漂流，做d好遊客既野，例如搭叮叮同天星小輪。脫離左個城市既脈絡，再審視香港呢個屋企，只有無限既惆悵。不過我諗我同香港既連結依舊係義無反顧，同香港既前程一樣，亦都係一往無前既。
- 再殺一個人
「有理想嘅文青到某個階段開始變得深奧／簡單嘅字句要有學術字眼先表達到」
「近年我嘅生活開始無咁刺激無咁虛無／以前深夜我會打俾人講我殺咗人一時糊塗」
「我懷念嗰陣時每日每夜都好emo／你係我嘅青春期永遠唔會再接觸到」
係一開始最觸動到我既MLA作品，尤其係上面第一句，讀得越多書就越有呢種體會xd，開始變得d好簡單既概念同字句都要用上學術字眼先表達到。當然我希望我仲係一個有理想嘅文青^^，尤其係仲可以享受每日每夜既emo。題外話，幾慶幸暫時脫離左columbia高壓既環境，黎到歐洲d甘chill既地方，終於可以重拾對生活既敏感，繼續emo。
- 沖繩流浪貓
「慢慢走近到我身上／好幾次把我差點抓傷」
係近期係咁loop既MLA作品，尤其係最最最鍾意段前奏，好迷幻，完全想像到有一隻貓慢慢從背後走近到我身上既感覺。我鍾意首歌無非兩個原因：一，好鍾意沖繩個種異國既情調，令我想話走就走甘去流浪。二，好鍾意隻貓，貓系命運既化身，你估唔到佢會幾時走近，甚至會把你差點抓傷，所以你要馴服佢。
- hey hey baby
「手機裡螢幕放著是你照片／當要看時間便看見你視線」
呢首歌最觸動到我既係段MV，片段入面既hey hey nicky完全係每個文青既理想對象xd。至於首詞本身，講既係時間同戀愛既關係，兩樣相對各自都係relative。戀愛既感覺會隨時間變化，但係戀愛既框架下，時間既流動都會變化。其實冇甘複雜，hey hey baby純碎係示愛既歌。
- 失落沮喪歌
「我沒法想像，看過的童話故事
有陣時成長不過是個悲劇的開始」
MLA早期既歌，都係關於coming of age。人長大，就會realise成長不過是個悲劇的開始，然後探索死亡的意義。所以失落沮喪係冇問題，老問題一樣係應否自殺。
- 阿姆斯特丹夜機
「我諗起小學有次交功課 題目係當父母唔俾自己睇電視 作為子女應該點
『 我寫「我會看窗外鄰家的電視」「雖然沒有聲音但好過沒有得看」』
「我已經有愛人 香港無我嘅事」
我對於呢首歌有好複雜既情感，我好鍾意首歌講既逃避主義，面對住香港既荒謬，係2019年前既我，一直都想不顧而去。但係2019年後，我覺得消極既反抗都係反抗，正如你唔比我睇電視，我會看窗外鄰家的電視，反抗就是彰顯生命的本身。
- 麥記的最後一夜
「麥記的最後一夜 白燈、廣東歌與露宿者」
「寒夜跟你到麥記 朱古力當是酒 我若全力追究 你也會來去自由」
「但是你從不愛拖手 只是放手進我衣袖 代表只想取暖 是否？」
另一首近期不斷loop既MLA作品，我好鍾意首歌既imagery，白燈、橙汁、廣東歌與露宿者，係青春期既麥記，個時既麥記冇iPad落單，新地筒仲係兩個半，廣東歌係播緊仲有好多人聽既勁歌金曲。朱古力當是酒呢一句，真係好童真，但係偏偏成首詞係講成人無法避免既離別。不過你若只想取暖，比你放手進我衣袖又有何妨？
- 我在暗中儲首期
「不要重演西西的《感冒》」
讀過西西的感冒，就會明白我的失語症也許是永遠也不會痊癒了。失語並非失去物理上的說話能力，而是自己的懦弱失去挑戰社會框架的勇氣，如果讀甘多書都只係諗住掙錢買樓儲首期，真係不如死左佢算。好嚮往感冒結尾：「我有的是時間。……讓我就這樣子，挽着我的一個胖胖的旅行袋，先去看一場足球再說。」好慶幸我係大學就有少少咁樣既覺悟，唔會三十幾歲後先重演西西的《感冒》。縱使要不斷克服失語症，起碼覺醒了，也是好的。
係十五首歌之後，以林愈靜對MLA既描述作結：//你快要四十歲，三十多年來表面上和大部分人一樣，上學，上班，談幾場不太成功的戀愛，結婚生子，逐漸老去，泯然眾人。但你內心一直有一塊保留地，在那裏，你體會著狂野，體會孤獨，敏感，羞怯卻又睥睨眾生。有時候你覺得自己人生就這樣了，完了，總是和主流社會格格不入，是別人眼中的「廢青」，有時候你又為了生活中別人不能體察的小事長久感動，滿足，淚水充盈了眼眶，覺得不枉此生。這些複雜感覺長久地留在你身上，變成一個看不見但又非常堅硬的存在，像個隱形的翅膀，必要時用來抵抗人間的一切。這種隱秘的感情屬於你自己而你覺得自己如此孤獨。 //
My Little Airport 的音樂就是如此。
My Little Airport 的音樂就是如此。